Jai hanuman story in tamil

காரியத் தடை இருப்பவர்கள், நினைத்த காரியம் நடக்க வேண்டும் என நினைப்பவர்கள், முதலில் தங்களின் குலதெய்வத்தை வழிபட்ட பிறகே அந்த காரியத்தை செய்ய துவங்க வேண்டும். அதற்கு பிறகு அவர்கள் வணங்க வேண்டிய தெய்வம் ஆஞ்சநேயர்.

பொதுவாக காரிய தடை ஏற்படுகிறது என்றால் அதற்கு காரணம் கிரகங்கள் சரியாக இல்லை என்பது தான் காரணமாக சொல்லப்படும். இதனால் காரிய தடை அகல ஆஞ்சநேயரை வழிபட வேண்டும்.

நினைத்த காரியம் நிறைவேற வேண்டும், துவங்கும் காரியங்களில் வெற்றிகள் மட்டுமே வர வேண்டும் என்பவர்கள் ஆஞ்சநேயருக்கு வால் வழிபாட்டினை மேற்கொள்ளலாம். ஏதாவது ஒரு நல்ல நாள் பார்த்து இந்த வழிபாட்டினை துவக்கலாம்.

நவகிரகங்களின் இயக்கம் சரியில்லாததற்கும், ஆஞ்சநேயருக்கு வால் வழிபாடு செய்வதற்கும் என்ன தொடர்பு என்ற கேள்வி பலரின் மனதிலும் தோன்றலாம். இதற்கு ஒரு கதை உண்டு.

இன்று மார்கழி சிவராத்திரி : வேறு என்ன சிறப்பு இந்த நாளில் ?

தாயிடம் அனுமன் கேட்ட கேள்வி

ஆஞ்சநேயர் சிறு குழந்தையாக இருந்த போது தனது தாய் அஞ்சனையிடம், எனக்கு பசிக்கிறது என்றால் இப்போது நீ உணவு தருகிறாய்.

நீ அருகில் இல்லாத சமயத்தில் எனக்கு பசி வந்தால் நான் என்ன செய்வது என குழந்தைத்தனமாக கேட்டுள்ளார். அதற்கு அவரது தாய், பழங்களை பறித்து சாப்பிடு என பதிலளித்துள்ளார். அப்போதும் விடாமல் பழமா? அது எப்படி இருக்கும் என கேட்டுள்ளார் ஆஞ்சநேயர். அதற்கு பதிலளித்த அஞ்சனை, பழம் என்றால் சிவப்பாக இருக்கும் என கூறி உள்ளார்.

அனுமன் பெயர் வர காரணம்

ஒருநாள் அதிகாலை வேளையில் வானத்தில் பார்த்த ஆஞ்சநேயரின் கண்ணில் சிவந்திருந்த சூரியன் பட்டது.

இது தான் அம்மா கூறிய பழம் போல. அது எப்படி உள்ளது என சுவைத்து பார்க்கலாம் என்று நினைத்து சூரியனை துரத்த ஆரம்பித்துள்ளார். பதறிப் போய் சூரியனும் ஓடி உள்ளார். இதைக் கண்ட இந்திரன் தனது வஜ்ராயுதத்தால் தாக்கியதால் ஆஞ்சநேயருக்கு கன்னத்தில் காயம் ஏற்பட்டது. இதனால் தான் அவருக்கு அனுமன் என்ற பெயர் வந்தது. இந்திரனின் இந்த செயலால் கோபம் கொண்ட வாயு தேவன், தனது செயல்களை சுருக்கிக் கொண்டார்.

பிறகு அனைத்து தேவர்களும் வந்து அவரை சமாதானம் செய்துள்ளனர்.

திருப்பதியில் நாளை அத்யாயன உற்சவம் ஆரம்பம்

வால் வழிபாடு ஏன்?

மற்றொரு சமயம் அனுமனுக்கு நிறைய கல்வி கற்க வேண்டும் என்ற எண்ணம் வந்தது. இதனால் ஞானத்தில் சிறந்தவரான சூரியனிடம் கல்வி கற்க சென்றார்.

இந்த முறை மிக பணிவாக சென்று சூரியனிடம் கல்வி கற்றுத் தர வேண்டும் என கேட்டார். அதற்கு சூரிய பகவானோ, நான் ஒரு இடத்தில் இருக்க மாட்டேன். நான் போகிற போக்கிற்கு என்னுடன் வந்தால் கற்றுத் தருகிறேன் என்றார். அனுமன், வாயு புத்திரன் என்பதால் சூரியன் போகும் வேகத்திற்கு ஈடு கொடுத்து சென்றார்.

அப்படி அவர் செல்லும் போது அவர் வாலின் பின்னாலேயே நவகிரகங்களும் வர துவங்கி விட்டன. நவகிரகங்களின் பாதிப்புக்களில் இருந்து மீள அனுமனின் வாலை வழிபட்டாலே போதும்.

திருவெம்பாவை பதிகம் 06 : மானே நீ நென்னலை நாளை

வால் வழிபாடு செய்யும் முறை :

நல்ல நாள் பார்த்து இந்த வழிபாட்டை துவக்க வேண்டும்.

அன்று அதிகாலை எழுந்து நீராடி, வீட்டில் உள்ள அனுமன் படத்திற்கு துளசி மாலை அல்லது துளசி இலைகளை சாற்ற வேண்டும். வெற்றிலையிலும் மாலை கட்டி போடலாம். அனுமனை மனதார வணங்கி, நமது மனக்குறையை சொல்லி வழிபட்டு, அனுமனின் வால் துவங்குகிற இடத்தில் சந்தனத்தால் ஒரு பொட்டு வைக்க வேண்டும். ஸ்ரீ ராம ஜெயம் என சொல்லிக் கொண்டே சந்தன பொட்டு வைத்து, அதன் மீது குங்குமத்தால் ஒரு பொட்டு வைக்க வேண்டும்.

இதே போல் தினம் ஒரு பொட்டு வீதம் 48 நாட்கள் வாலின் நுனி வரை வைக்க வேண்டும். வாலின் அடி துவங்கி, நுனி வருவதற்குள் நாம் என்ன காரியத்தை நினைத்து வழிபட்டோமோ அந்த காரியம் நடந்து விடும்.

ஒருவேளை பெண்கள் இந்த வழிபாட்டினை மேற்கொண்டால், இடையில் மாதவிடாய் வரும் நாட்களை தவிர்த்து விட்டு, மற்ற நாட்களை 48 நாட்களாக கணக்கில் எடுத்துக் கொண்டு வழிபாட்டினை தொடரலாம்.

பூஜை செய்து கொண்டிருக்கும் போதே நினைத்த காரியம் நடந்து விட்டால், இடையில் பூஜையை நிறுத்தாமல் 48 நாட்கள் பூஜையை பூர்த்தி செய்ய வேண்டும்.

சொல்ல வேண்டிய மந்திரம் :

அனுமன் சாலிசா, சுந்தர காண்டம், அனுமன் மந்திரங்கள் ஏதாவது தெரிந்தால் அதை சொல்லிக் கொண்ட இந்த பூஜையை செய்யலாம்.

எதுவும் தெரியாதவர்கள், கம்ப ராமாயணத்தில் வரும் இந்த பாடலை பாடலாம்.

அஞ்சிலே ஒன்ற பெற்றான் அஞ்சிலே ஒன்றைத் தாவி

அஞ்சிலே ஒன்று ஆறு ஆக ஆரியர்க்காக ஏகி

அஞ்சிலே ஒன்று பெற்ற அணங்கைக் கண்டு அயலாரூரில்

அஞ்சிலே ஒன்றை வைத்தான் அவன் எம்மை அளித்துக் காப்பான்